Svikahrappar beita ýmsum aðferðum til að komast yfir notendanöfn og lykilorð fólks að tölvupósti þess eða samfélagsmiðlareikningum svo dæmi séu nefnd. Mikilvægt er að koma í veg fyrir að þeim takist það og ein besta vörnin gegn slíkum þjófnaði er að notast við tveggja þátta auðkenningu (e. two-factor authentication). Það er að segja að með því að virkja tveggja þátta auðkenningu bætist við krafa um að skammtímanúmer sé slegið inn við innskráningu til viðbótar við notandanafn og lykilorð. Skammtímanúmer eða skammtímakóði gildir einungis í stuttan tíma, oft bara 30-60 sekúndur. Ef netglæpamenn ná að stela notandanafni og lykilorði þínu þá dugar það þeim ekki til að komast inn á aðganginn þinn þar sem að þeir hafa ekki skammtímanúmerið – að því gefnu að þú hafir virkjað kröfu um tveggja þátta auðkenningu.
Áður en tveggja þátta auðkenning er virkjuð fyrir Gmail eða Outlook tölvupóstinn, Facebook, Instagram, Tiktok eða aðra aðganga þá er nauðsynlegt að þú setjir upp auðkenningarapp (e. authenticator app) á símtækið þitt. Auðkenningarappið sér um að búa til skammtímanúmerið fyrir hvern og einn aðgang eða kerfi þar sem þú virkjar tveggja þátta auðkenningu.
Vinsælustu öppin sem notuð eru fyrir tveggja þátta auðkenningu eru:
– Authy
– Google Authenticator
– LastPass Authenticator
– Micrososft Authenticator
Hér á eftir verður farið yfir hvernig þú getur sett upp Authy auðkenningarappið á símtækið þitt. Athugaðu að það er nóg fyrir þig að velja bara eitt auðkenningarapp. Authy er gjaldfrjálst app eins og hin sem nefnd voru hér að ofan.
Uppsetning á Authy
Tími sem þarf: 3 minutes
Uppsetning á Authy
- Sækja Authy auðkenningarappið
Fyrsta skrefið til að setja upp Authy er að opna App store á símanum þínum.
- Finna Authy appið
Til að finna Authy auðkenningarappið velur þú stækkunarglerið (e. search), slærð inn Authy og ýtir á stækkunarglerið til að setja leit í gang.
- Sækja Authy appið
Þú sérð núna lista yfir nokkur öpp og velur app sem heitir Twilio Authy og ýtir svo á hnappinn Get.
- Uppsetning á reikning / aðgangi
Þegar Authy appið er komið á símann þinn þá velur þú að opna það og um leið ertu beðin(n) um að slá inn símanúmerið þitt og netfang.
- Staðfesting á reikning / aðgangi
Þú velur að staðfesta aðgang þinn með smáskilaboði (e. SMS). Þú færð þá sent númer í smáskilaboði til að staðfesta reikninginn.
- Vista afrit í skýinu
Þér er nú boðið að vista öruggt, dulkóðað afrit af stillingum fyrir tveggja þátta auðkenningar sem þú munt seinna setja inn þegar þú virkjar tveggja þátta auðkenningu á Facebook, Instagram eða annars staðar. Við mælum eindregið með að þú gerir þetta til að draga úr óþarfa vandræðum ef síminn þinn bilar eða týnist.
Þegar þú velur að vista afrit í skýinu (e. enable backup) þá þarftu að búa til gott lykilorð sem notað er til að dulkóða stillingarnar. Ekki gleyma þessu lykilorði 🙂 - Uppsetningu lokið
Nú er uppsetningunni á Authy auðkenningarappinu lokið og þú getur farið að nota það fyrir tveggja þátta auðkenningu í þeim skýjaþjónustum sem þú notar.